لاہور( سن نیوز): ایچ بی ایل پی ایس ایل 7 میں کوئٹہ گلیڈی ایٹرز کے 167 رنز کے ہدف کے تعاقب میں کراچی کنگز کی ٹیم 143 رنز ہی بنا سکی۔لاہور کے قذافی اسٹیڈیم میں کھیلے گئے ایچ بی ایل پی ایس ایل کے 7ویں ایڈیشن کے 28ویں میچ میں کوئٹہ گلیڈی ایٹرز کی جانب سے دیئے گئے 167 رنز کے ہدف کے تعاقب میں کراچی کنگز کے جوئے کلارک اور بابر اعظم نے اننگز کا آغاز کیا اور 87 رنز کی شراکت داری قائم کر کے پوزیشن کو مستحکم کیا، پھر بابر اعظم 36 رنز کے بنا کر آؤٹ ہوئے۔اس کے بعد دوسرے آؤٹ ہونے والے کھلاڑی شرجیل خان تھے جو 107 کے مجموعی جبکہ 16 کے انفرادی اسکور پر پویلین روانہ ہوئے، دوسرے طرف جوئے کلارک نے اپنی نصف سنچری مکمل کی، پھر 109 پر وہ 51 رنز بنا کر آؤٹ ہوئے، قاسم اکرم 120، روحیل نظیر 128، لیوس گریکوری ، ٹام لیمبونبی اور عماد وسیم 139 کے مجموعی اسکور پر پویلین روانہ ہوئے۔کراچی کنگز کی ٹیم مقررہ اوورز میں 8 وکٹوں کے نقصان پر 143 رنز بنا سکی، یوں اُسے 23 رنز سے شکست کا سامنا کرنا پڑا، جوئے کلارک 52 اور بابر اعظم کی 36 رنز اننگز کے علاوہ کوئی بھی بلے باز گلیڈی ایٹرز کے بولرز کا سامنا نہ کرسکا۔ کوئٹہ کے خرم شہزاد نے چار، نسیم شاہ نے دو جبکہ عرفان اور عاشر قریشی نے ایک ایک وکٹ حاصل کی۔اس سے قبل کوئٹہ گلیڈی ایٹرز نے ٹاس جیت کر پہلے بیٹنگ کا فیصلہ کیا اور ٹیم کی جانب سے جیسن روئے اور ول سمید نے اننگز کا آغاز کیا تاہم ول سمید غلط شارٹ کھیلتے ہوئے 10 رنز بنانے کے بعد عثمان شنواری کی گیند پر لوئس گریگوری کے ہاتھوں کیچ آؤٹ ہوئے۔تیسرے نمبر پر آنے والے بیٹسمین جیمز ونس نے جیسن روئے کے ساتھ مل کر اسکور بورڈ کو آگے بڑھایا اور 117 رنز کے مجموعی اسکور پر جیمز ونس بھی 29 رنز بنانے کے بعد آؤٹ ہوگئے۔اگلے آنے والے بیٹسمین عمر اکمل بھی محض 2 رنز بنانے کے بعد واپس پویلین چلتے بنے جب کہ جیسن روئے شاندار 82 رنز بنانے کے بعد میر حمزہ کی گیند پر آؤٹ ہوگئے جس کے بعد افتخار احمد اور حسن خان نے اسکور کو آگے بڑھایا اور 166 رنز بنانے کے بعد کراچی کنگز کو جیت کے لئے 167 رنز کا ہدف دیا۔کراچی کنگز کی جانب سے عماد وسیم، میر حمزہ، عثمان شنواری اور لوئس گریگوری نے ایک ایک وکٹ حاصل کی۔