اسلام آباد( سن نیوز)عالمی شہرت یافتہ بالی ووڈ اداکارہ پریانکا چوپڑا نے کہا ہے کہ یوکرین اور روس کی جنگ میں معصوم جانیں غیر محفوظ ہیں۔پریانکا چوپڑا نے یوکرین کے جاری بحران پر ردعمل کا اظہار کیا ہے، جس نے یورپی ملک کے بے گناہ باشندوں کی زندگیاں اجیرن کر دی ہیں، اداکارہ نے صورتحال کو ‘خوفناک’ قرار دیا ہے اور یونیسیف کی جانب سے ان کی مدد کے لیے تعاون کی درخواست کی ہے۔ فوٹو اینڈ ویڈیو شیئرنگ ایپ انسٹاگرام پر پریانکا چوپڑا نے روس کے زیرِ قبضہ یوکرین کی صورتحال پر ایک نیوز کوریج کی ویڈیو شیئر کی ہے جس میں دکھایا گیا ہے کہ کس طرح لوگوں نے روس، یوکرین جنگ کے دوران محفوظ رہنے کے لیے سب وے اسٹیشنوں کو زیرِ زمین بنکروں میں تبدیل کر دیا ہے۔پریانکا چوپڑا نے لکھا کہ ّیوکرین میں سامنے آنے والی صورتحال خوفناک ہے۔ بے گناہ لوگ اپنی زندگیوں اور اپنے پیاروں کی زندگیوں کے خوف میں جی رہے ہیں جبکہ مستقبل قریب کی غیر یقینی صورتحال کو نیویگیٹ کرنے کی کوشش کر رہے ہیں۔اداکارہ نے لکھا کہ یہ سمجھنا مشکل ہے کہ جدید دنیا میں یہ اس طرح کے تباہ کن موڑ تک کیسے بڑھ سکتا ہے لیکن یہ ایک نتیجہ خیز لمحہ ہے جو پوری دنیا میں گونجے گا۔