کیلی فورنیا – ایکس ایپلی کیشن (سابقہ ٹوئٹر) نے اپنے پلیٹ فارم سے ملازمتوں کے اشتہارات دکھانا شروع کردیے ہیں، اس سلسلے میں اہم اداروں کی جانب سے ملازمتوں کے لیے مطلوب اسامیوں کی فہرست جاری کی گئی ہے۔

سماجی رابطوں کے پلیٹ فارم کے نئے بی ٹا ورژن میں دیکھا جا سکتا ہے کہ ایکس (سابقہ ٹوئٹر) نے کئی مہینوں کے آزمانے کے بعد صارفین کے لیے ملازمتوں کی فہرست جاری کی ہے۔ ایپلی کیشن پر اس سہولت سے مختلف ادارے اور کمپنیاں اعلیٰ افرادی قوت کی تلاش کے لیے اپنے اشتہارات شائع کر سکیں گے۔

اس ضمن میں سامنے آنے والے اسکرین شاٹس میں دیکھا جا سکتا ہے کہ سنہرے نشان والے، کاروبار اور کمپنیوں کے پروفائل ، مرکزی ٹائم لائن یا فالوورز کے اعداد کے ساتھ ہی نوکریوں کی لسٹ دیکھی جاسکتی ہے۔

بی ٹا ورژن میں ویوآل جابز پر کلک کرکے آپ تمام ملازمتوں تک پہنچ سکتے ہیں جو اس کمپنی نے پوسٹ کی ہے۔ اسی ایپ سے ملازمت کی درخواست بھی دی جاسکتی ہے۔ ایکس نے کہا ہے کہ وہ ان ملازمتوں کے درست ہونے کی ضمانت بھی لے رہا ہے۔ اگرآپ کسی کمپنی کے مالک ہیں تو اس سہولت کے لیے اپنے ادارے کی تصدیق کرانا ہوگی۔ اس کے لیے 1000 ڈالر ماہانہ کا پریمیم بزنس پلان خریدنا ہوگا۔