لاہور( سن نیوز)مسلم لیگ کی نائب صدر مریم نواز نے کہا ہے کہ وزیراعظم عمران خان کے گرد پٹرول مافیا نے گھیرا ڈالا ہوا ہے۔مریم نواز نے جاتی امراء رائیونڈ میں میڈیا سے گفتگو کرتے ہوئے کہا کہ پٹرول اور ڈیزل مافیا نے عمران خان کے اردگرد گھیرا ڈالا ہوا ہے، عوام کے پیسے سے ان سب کی جیبیں بھری گئی ہیں، موجودہ حکومت میں ہر چیز مہنگی ہوگئی ، ہر ایک کےپاس اے ٹی ایمز نہیں ہوتی جو کچن چلاتے ہیں ، پینڈورا پیپرز سے عمران خان کی اے ٹی ایم کے نام سامنے آئے ، ملک میں بہت سے لوگوں کی آمدن بیس ہزار سے کم ہے، سب بنی گالا میں نہیں رہتے ، حکومت نے عوام کو جتنا درد اور تکلیف دی اس کا ازالہ نہیں ہوسکتا ، حکومت کو یہ پتہ نہیں آج گئی یا کل گئی ، لوگ بجلی،گیس کے بل کہاں سے بھریں گے۔مریم نواز نے کہا کہ ملک میں ڈینگی سے نہیں بلکہ حکومتی نالائقی سے اموات ہورہی ہیں، حکمرانوں کی پہلے اپوزیشن سے انتقام پر توجہ تھی اور اب حکومت بچانے پر ہے، عوام جانتے ہیں ملک سے کیا کھیل کھیلا جارہاہے، شہبازشریف اقتدار میں ہوتے تو ادویات گھروں میں پہنچتی تھیں، عمران خان ان پر ڈرامہ کرنے کا الزام لگاتے تھے، یہ اتنی بے حس حکومت ہے جس سے ڈرامہ بھی نہیں ہورہا، عوام جھولی اٹھاکر حکومت کو بددعا دے رہے ہیں، ن لیگ اور پی ڈی ایم شاید ابھی لانگ مارچ کی تیاری نہیں کررہیں، حکومت نے خود اپنے خلاف لانگ مارچ کی تیاری کرلی ہے، پہلے حکومت کی اپوزیشن کو مارنے کی کوشش اور اب ان حکومت بچانے پر توجہ ہے، اپنی نالائقی سے حکومت کا 9 سال کا پلان تباہ و برباد ہوگیا ہے، 2023 تو دور کی بات حکمرانوں کیلئے 2021ء مکمل کرنا مشکل ہے، روز ان کی دوڑیں لگ رہی ہیں اور ہمیں چیزیں نظر آرہی ہیں، نوشتہ دیوار کو پڑھنا مشکل نہیں۔مریم نواز کا کہنا تھا کہ عمران خان حکومت کو بچانے کے لیے جوڑ توڑ حساب کتاب میں مصروف ہے کہ ع سے شروع ہوتا ہے یا ف سے، مارچ ٹھیک نہیں دسمبر ٹھیک ہے، وہ ان چیزوں میں الجھا ہے اس کی بلا سے غریب عوام پس جائے، غریب آدمی ختم ہوجائے تو کس سے اس چیز کا شکوہ کروںامریکی سفارتخانے کی ناظم الامور انجیلا ایگلر سے ملاقات سے متعلق سوال کے جواب میں مریم نواز نے کہا کہ ان سے بہت سے معاملات پر بات ہوئی ہے، جو لوگ امریکی صدر جوبائیڈن کے فون کا انتظار کررہے ہیں ان کے لیے تو یہ ایک بہت بڑی خبر ہے، میں نے اپنی اور ن لیگ کی طرف سے پاکستان سے متعلق خدشات سے امریکی ناظم الامور کو آگاہ کیا، ملاقات میں پارٹی کے سینئر لوگ بھی شریک ہوئے تھے۔مریم نواز نے مزید کہا کہ کسی کا نام نہیں لوں گی لیکن ہر پارٹی میں ہر طرح کے لوگ ہیں اور ہر قسم کی سوچ ہوتی ہے، ہماری پارٹی میں جو لوگ ڈر رہے تھے ان کا ڈر بھی اب اتر گیا ہے اور پتہ چل گیا کہ نواز شریف جو کہہ رہے تھے ٹھیک کہہ رہے تھے،