کراچی – سونے کی قیمت میں کئی دن سے جاری کمی کا سلسلہ ٹوٹ گیا، منگل کے روز سونے کی مقامی مارکیٹ میں اچانک بڑا اضافہ ہوگیا۔ بین الاقوامی بلین مارکیٹ میں کاروبار کے دوران سونے کی فی اونس قیمت میں 15 ڈالر کی کمی ریکارڈ ہوئی، جس سے نئی قیمت ایک ہزار 911 ڈالر کی سطح پر آ گئی۔

دوسری جانب عالمی مارکیٹ کے برعکس مقامی سطح پر سونے کی قیمتوں میں اچانک بڑا اضافہ ریکارڈ کیا گیا۔

مارکیٹ ذرائع کے مطابق سونے کی فی تولہ قیمت میں 5 ہزار 600 روپے کا اضافہ ہوا، جس سے نئی قیمت 2 لاکھ 15 ہزار روپے ہو گئی۔

اسی طرح فی 10 گرام سونے کی قیمت میں 5 ہزار 58 روپے کے اضافے سے نئی قیمت ایک لاکھ 84 ہزار 585 روپے کی سطح پر آ گئی۔

دریں اثنا ملک میں چاندی کی قیمت میں بھی منگل کے روز اضافہ ہوا۔ چاندی کی قیمت فی تولہ 50 روپے بڑھ کر 2 ہزار 550 روپے ہو گئی جب کہ فی 10 گرام چاندی کی قیمت بھی 42 روپے 87 پیسے اضافے سے 2 ہزار 186 روپے 21 پیسے کی سطح پر آ گئی۔