اسلام آباد – خصوصی سرمایہ کاری سہولت کونسل ملک میں سرمایہ لانے کے لیے متحرک ہو گئی، اس سلسلہ میں خصوصی سرمایہ کاری سہولت کونسل کی ایگزیکٹو کمیٹی کا چوتھا اجلاس ہوا۔
ایگزیکٹو کمیٹی کا اجلاس وزیر منصوبہ بندی کی زیرصدارت ہوا، اجلاس میں کونسل کے نیشنل کوآرڈی نیٹر، متعلقہ وفاقی و صوبائی وزراء نے شرکت کی، اجلاس میں حائل رکاوٹوں کو دور کرنے اور سرمایہ کاری ماحول کو بہتر بنانے پر غور کیا گیا۔
اجلاس میں متعلقہ وزارتوں نے مختلف پہلوؤں پر پیش رفت کا جائزہ پیش کیا، کمیٹی نے ایس آئی ایف سی کی جاری آؤٹ ریچ حکمت عملی پر اظہار اطمینان کیا۔
کمیٹی نے ہدایت کی کہ بیرون ملک کاروباری برادری اور مشنز کی شمولیت کے عمل کو آگے بڑھایا جائے، ملک میں سرمایہ کاری کے ایکو سسٹم کو مزید بہتر بنانے کے لئے اقدامات کی سفارش بھی کی گئی۔
اجلاس میں سرمایہ کاروں کے لئے ویزا کی سہولت، تنازعات کے حل کے نظام کا بھی جائزہ لیا گیا، زرعی ، آئی ٹی ، معدنیات اور توانائی کے شعبوں میں منظور منصوبوں کی تکنیکی اصلاح کا بھی جائزہ لیا گیا۔
ایگزیکٹو کمیٹی کی تجاویز منظوری اور عملدرآمد کے لیے ایپکس کمیٹی کے اجلاس میں پیش کی جائیں گی۔
