اسلام آباد( سن نیوز)پی سی بی نے پی ایس ایل میں پشاور زلمی اور کوئٹہ گلیڈی ایٹرز کے میچ کے دوران ہونے والی گرما گرمی پر کرکٹر سہیل تنویر اور بین کٹنگ پر جرمانہ عائد کردیا۔پشاور زلمی کے بین کٹنگ اور کوئٹہ گلیڈی ایٹرز کے سہیل تنویر نے ایک دوسرے کو نازیبا اشارے کیے تھے۔ذرائع کا بتانا ہے کہ پی سی بی نے ایکشن لیتے ہوئے دونوں کھلاڑیوں پر جرمانہ عائد کیا ہے۔ذرائع کے مطابق سہیل تنویر پر میچ فیس کا 15فیصد جرمانہ عائد کیا گیا ہے۔واضح رہے کہ پاکستان سپر لیگ (پی ایس ایل) سیون میں کوئٹہ گلیڈی ایٹرز کے سہیل تنویر اور پشاور زلمی کے بین کٹنگ میں تلخ کلامی ہوئی تھی۔قذافی اسٹیڈیم میں کھیلے جانے والے ایونٹ کے 22ویں میچ میں پشاور زلمی کی اننگز کے 19ویں اوور میں بین کٹنگ نے سہیل تنویر کو 3 گیندوں پر تین چھکے رسید کرکے نامناسب اشارے کیے۔اسی اوور میں کٹنگ نے تنویر کو چوتھا چھکا بھی رسید کردیا، جس پر سہیل تنویر سیخ پا ہوگئے اور دونوں کے درمیان تلخ جملوں کا تبادلہ ہوا، تاہم امپائر نے بیچ میں آکر معاملے کو رفع دفع کروایا۔معاملہ یہاں ختم نہیں ہوا بلکہ اگلے اوور میں نسیم شاہ کی گیند پر بڑا شاٹ لگانے کی کوشش کرنے پر بین کٹنگ کیچ آؤٹ ہوگئے، ان کا کیچ سہیل تنویر نے لیا اور پھر جواب میں انہوں نے بھی بین کٹنگ کی جانب نامناسب اشارے کیے۔دونوں کھلاڑیوں کے درمیان یہ چپقلش کیریبیئن پریمیئر لیگ میں بھی دیکھنے کو ملی تھی۔