اسلام آباد( سن نیوز)قومی اسمبلی سیکریٹریٹ نے اپوزیشن کی وزیرِ اعظم عمران خان کے خلاف تحریکِ عدم اعتماد ضابطے کے مطابق قرار دے دی۔قومی اسمبلی کے ذرائع کے مطابق تحریکِ عدم اعتماد اور ریکوزیشن پر اپوزیشن اراکین کے دستخطوں کی تصدیق مکمل ہو گئی۔’’کسی رکن کے دستخط مشکوک نہیں نکلے‘‘ذرائع قومی اسمبلی کا کہنا ہے کہ کسی بھی رکن کے دستخط مشکوک یا رول آف سائن کے خلاف نہیں نکلے۔ذرائع نے بتایا ہے کہ قومی اسمبلی کے شعبۂ قانون سازی نے تمام ضوابط پورے کرنے کے بعد فائل اسپیکر کو بھجوا دی۔ذرائع قومی اسمبلی کا کہنا ہے کہ اسپیکر کو 22 مارچ سے قبل کسی بھی دن اجلاس بلانے کی تجویز بھی دے دی گئی ہے۔وزیرِ اعظم نے مشاورت کیلئے سینئر قیادت کو بنی گالہ بلا لیاقومی اسمبلی کے ذرائع نے بتایا ہے کہ اجلاس بلانا ایک آئینی تقاضہ ہے جس سے انحراف نہیں کیا جا سکتا۔ذرائع قومی اسمبلی کا مزید کہنا ہے کہ پہلا مرحلہ ریکوزیشن پر دستخطوں کی تصدیق جبکہ دوسرا عدم اعتماد کی تحریک پر دستخطوں کی تصدیق تھا۔قومی اسمبلی کے ذرائع نے یہ بھی بتایا ہے کہ دونوں مراحل مکمل ہونے اور تحریک کے ضابطے کے مطابق ہونے کا جائزہ لیا گیا ہے۔مشاورت کیلئے سینئر قیادت بنی گالہ طلبدوسری جانب وزیرِ اعظم عمران خان نے تحریکِ عدم اعتماد کے حوالے سے مشاورت کے لیے سینئر قیادت کو اسلام آباد میں واقع اپنی رہائش گاہ بنی گالہ بلا لیا۔ذرائع کے مطابق وزیرِ اعظم عمران خان اس حوالے سے حتمی مشاورت کریں گے کہ تحریکِ عدم اعتماد کے سلسلے میں قومی اسمبلی اجلاس کب بلایا جائے۔ذرائع نے مزید بتایا ہے کہ وفاقی وزراء پرویز خٹک، علی زیدی، فواد چوہدری اور شفقت محمود وزیرِ اعظم عمران خان سے مشاورت میں شریک ہوں گے۔ذرائع کا یہ بھی کہنا ہے کہ وزیرِ اعظم عمران خان قومی اسمبلی کا اجلاس بلانے کی حتمی منظوری دیں گے۔