اسلام آباد( سن نیوز)نئی وفاقی کابینہ نے حلف اٹھا لیا، قائم مقام صدر، چیئرمین سینیٹ صادق سنجرانی نے کابینہ کے ارکان سے حلف لیا۔وفاقی کابینہ کی حلف برداری کی تقریب ایوانِ صدر اسلام آباد میں ہوئی۔
ملک چلانے کے لیے وزیرِ اعظم شہباز شریف کی ٹیم سامنے آ گئی، ن لیگ اور اتحادیوں پر مشتمل 34 رکنی کابینہ نے حلف اٹھا لیا۔حلف اٹھانے والوں میں خواجہ آصف، احسن اقبال، رانا ثناء اللّٰہ، خواجہ سعد رفیق، مریم اورنگزیب سمیت ن لیگ کے 14 وزراء، نوید قمر، خورشید شاہ، شیری رحمٰن سمیت پیپلز پارٹی کے 9 وزراء شامل ہیں۔مولانا اسعد محمود، طلحہٰ محمود سمیت جے یو آئی کے 4 ارکان، فیصل سبزواری اور امین الحق سمیت ایم کیو ایم کے 2 ارکان، ق لیگ کے طارق بشیر چیمہ اور جمہوری وطن پارٹی کے شاہ زین بگٹی نے بھی حلف اٹھایا۔دوسری جانب وفاقی حکومت نے جہانگیر ترین گروپ کو مرکز میں اہم ذمے داری دینے کا فیصلہ کر لیا ہے۔عون چوہدری کو وزیرِ اعظم میاں محمد شہباز شریف کا مشیر بنانے کی سمری کابینہ ڈویژن نے تیار کر لی ہے۔حکومت کا ترین گروپ کو اہم ذمے داری دینے کا فیصلہعون چوہدری جہانگیر ترین گروپ سے تعلق رکھتے ہیں۔عون چوہدری ماضی میں سابق وزیرِ اعظم عمران خان کے قریبی ساتھی تصور کیے جاتے تھے۔